សៀមរាប៖ ចំណូលដែលមានពីការលក់វត្ថុអនុស្សាវរីយ៍ចម្លាក់ស្បែកគោ មានមួយផ្នែកធំ លោក ញឹក សិរីរតនា យកទៅផ្គត់ផ្គង់ក្មេងៗប្រមាណ៣០នាក់ ក្នុងបន្ទុក។  លោក សិរីរតនា ជាម្ចាស់សិប្បកម្មចម្លាក់ស្បែកគោមួយកន្លែងនៅស្រុកប្រាសាទបាគង ខេត្តសៀមរាប។ ក្រៅពីដាប់ស្បែកគោធ្វើជាវត្ថុអនុស្សាវរីយ៍លក់ជូនទេសចរ លោកក៏បានបណ្តុះកុមារតូចៗអំពីជំនាញនេះឥតគិតថ្លៃ ដើម្បីបន្សល់ទុកស្នាដៃទៅយុវជនជំនាន់ក្រោយ។

ជាយុវជនកំព្រាឪពុកម្ដាយ លោក ញឹក សិរីរតនា បានតស៊ូរៀនសូត្រលើជំនាញផលិត គូរ និងដាប់ឆ្លាក់វត្ថុសិល្បៈនានា ពីស្បែកសត្វ នៅក្នុងខេត្តសៀមរាប អស់រយៈពេល៤ឆ្នាំ។ ជាមួយនឹងបទពិសោធការងារ និងចំណេះជំនាញដែលបានពីរៀបសូត្រនេះ  លោក សិរីរតនា​ ក៏សម្រេចចិត្តបើកសិប្បកម្មចម្លាក់ស្បែកផ្ទាល់ខ្លួននៅចុងឆ្នាំ២០០១មកទល់បច្ចុប្បន្ន​។ 
 
នៅក្នុងសិប្បកម្មរបស់បុរសរូបនេះ ក្រៅតែជាការតាំងលក់នូវវត្ថុអនុស្សាវរីយ៍នានាពីចម្លាក់ស្បែកគោហើយនោះ ក៏ជាទីកន្លែងបណ្តុះបណ្តាលតូចមួយសម្រាប់យុវជនក្រោយ ផងដែរ។ « មិនត្រឹមជាកន្លែងផ្ដល់ចំណេះនិងជំនាញទេ តែក៏ផ្ដល់នូវប្រាក់កម្រៃដែលបានពីការលក់វត្ថុសិល្បៈ កន្លែងស្នាក់នៅ និងអាហារប្រចាំថ្ងៃដល់កុមារ និងយុវជនទាំងនោះថែមទៀត»។ នេះជាការលើកឡើងរបស់លោក លោក ញឹក សិរីរតនា។